គ្រប់គ្រងសិទ្ធិចូលប្រើម៉ាស៊ីនមេ Outline (តាមរយៈលេខកូដចូលប្រើ)
នៅពេលដែលអ្នកបានបញ្ចប់ការដំឡើងម៉ាស៊ីនមេ Outline របស់អ្នក ឥឡូវនេះអ្នកអាចចាប់ផ្តើមចែករំលែក និងគ្រប់គ្រងសិទ្ធិចូលប្រើម៉ាស៊ីនមេពីអ្នកប្រើប្រាស់បានហើយ។ អ្នកដែលទទួលបានការអញ្ជើញពីអ្នកនឹងអាចទាញយកកម្មវិធី Outline ដើម្បីប្រើ Outline សម្រាប់ការពារចរាចរណ៍អ៊ីនធឺណិតរបស់ពួកគេ។
ចែករំលែកសិទ្ធិចូលប្រើម៉ាស៊ីនមេ Outline របស់អ្នក
បន្ទាប់ពីអ្នកបានបញ្ចប់ការដំឡើងម៉ាស៊ីនមេ Outline អ្នកនឹងត្រូវបានបញ្ជូនទៅទំព័រព័ត៌មានលម្អិតរបស់ម៉ាស៊ីនមេនោះនៅលើ Outline Manager ដែលអ្នកអាចបង្កើតលេខកូដចូលប្រើបាន។ ស្វែងយល់បន្ថែមអំពីលេខកូដចូលប្រើ។
- បង្កើតលេខកូដ៖ ចុចរូបតំណាង "+" តូចនៅផ្នែកខាងក្រោមនៃទំព័រ ដើម្បីបង្កើតលេខកូដថ្មីៗ។
- ចែករំលែកលេខកូដ៖ នៅខាងស្តាំនៃលេខកូដនីមួយៗ មានរូបតំណាងចែករំលែកដែលអ្នកអាចចុចដើម្បីយកការអញ្ជើញ។ ចម្លង និងដាក់ការអញ្ជើញនេះចូលទៅក្នុងប្រព័ន្ធផ្ញើសារតាមជម្រើសរបស់អ្នក។
សំណើមុខងារ៖ ការចែករំលែកសិទ្ធិចូលប្រើពីក្នុងកម្មវិធី Outline Manager
អ្នកគ្រប់គ្រងម៉ាស៊ីនមេជាច្រើនស្នើឱ្យយើងសម្រួលដំណើរការនៃការអញ្ជើញដោយផ្តល់ឱ្យពួកគេនូវជម្រើសក្នុងការបញ្ចូលអាសយដ្ឋានអ៊ីមែលរបស់នរណាម្នាក់ដោយផ្ទាល់ទៅក្នុង Outline Manager។
គួរឱ្យសោកស្តាយ យើងទំនងជាមិនបង្កើតមុខងារនេះក្នុង Outline Manager ទេ។ គោលការណ៍ស្នូលមួយរបស់យើងគឺគាំទ្រដល់ឯកជនភាព និងសុវត្ថិភាពអ្នកប្រើប្រាស់របស់យើង ដែលមានន័យថាយើងមិនបានបង្កើតកន្លែងណាមួយ ដើម្បីបញ្ចូលអាសយដ្ឋានអ៊ីមែល ឬព័ត៌មានទំនាក់ទំនងនោះទេ។
ហេតុនេះ យើងស្នើឱ្យអ្នកគ្រប់គ្រងម៉ាស៊ីនមេប្រើប្រព័ន្ធផ្ញើសារដែលមានសុវត្ថិភាព ដូចជាអ៊ីមែល ឬការជជែកដែលមានសុវត្ថិភាព ដើម្បីផ្ញើការអញ្ជើញទៅអ្នកប្រើប្រាស់ចុងក្រោយ។
បទពិសោធដែលអ្នកប្រើប្រាស់នឹងឆ្លងកាត់ បន្ទាប់ពីអ្នកចែករំលែកលេខកូដចូលប្រើជាមួយគាត់
- អ្នកប្រើប្រាស់នឹងចុចលើតំណដំឡើងពីឧបករណ៍របស់គាត់
- គាត់នឹងត្រូវបានប្រាប់ឱ្យដំឡើងកម្មវិធី Outline ប្រសិនបើគាត់មិនទាន់មានកម្មវិធីនេះទេ
- គាត់នឹងបង្កើតការតភ្ជាប់ដំបូងទៅម៉ាស៊ីនមេ Outline របស់អ្នកតាមរយៈលេខកូដខុសប្លែកពីគេដែលបានបង្កប់នៅក្នុងការអញ្ជើញ
- ឥឡូវនេះ គាត់អាចប្រើប៊ូតុងភ្ជាប់/ផ្តាច់ ដើម្បីគ្រប់គ្រងសិទ្ធិចូលប្រើអ៊ីនធឺណិតរបស់គាត់តាមរយៈម៉ាស៊ីនមេ Outline របស់អ្នក
ដកសិទ្ធិចូលប្រើម៉ាស៊ីនមេ Outline របស់អ្នក
ពីទំព័រព័ត៌មានលម្អិតរបស់ម៉ាស៊ីនមេនៅក្នុង Outline Manager នៅខាងស្តាំនៃរាល់លេខកូដនៅលើម៉ាស៊ីនមេ អ្នកនឹងឃើញម៉ឺនុយដែលមានជម្រើសលុបលេខកូដ។ ការលុបលេខកូដដកសិទ្ធិចូលប្រើម៉ាស៊ីនមេរបស់អ្នកពីអ្នកប្រើប្រាស់។