របៀបដែល Outline ដំណើរការ

ការដំឡើងម៉ាស៊ីនមេ

ទោះបីជាការដំឡើង Outline ប្រហែលមើលទៅងាយស្រួលក៏ដោយ ក៏ជាក់ស្ដែងមានជំហានដ៏ស្មុគស្មាញមួយចំនួនកើតឡើងនៅក្រៅឆាកក្នុងការដំឡើងម៉ាស៊ីនមេរបស់អ្នកដែរ។ រាល់ពេលដែល Outline ត្រូវបានដំឡើង ស្គ្រីបដំឡើងដំណើរការជំហានដូចខាងក្រោមនេះ៖

កំណែរូបភាព Shadowbox ដែលមានស្ថិរភាពត្រូវបានទាញយក និងនាំចូលដោយប្រើ Docker។ រូបភាពត្រូវបានបង្ហោះនៅលើ Quay.io នៅក្នុង https://quay.io/repository/outline/shadowbox?tab=tags។ រូបភាពនេះមានម៉ាស៊ីនមេ Outline និង Management API ដែលក្រោយមកត្រូវបានប្រើប្រាស់ដោយកម្មវិធីគ្រប់គ្រងម៉ាស៊ីនមេ Outline ដើម្បីបង្កើតនិងដកលេខកូដចូលប្រើចេញ ជ្រើសរើសចូលរួម/ផ្ដាច់ចេញពីការរាយការណ៍អំពីមេទ្រិកអនាមិក។ល។
Watchtower ត្រូវបានដំឡើង និងកំណត់រចនាសម្ព័ន្ធឱ្យពិនិត្យរកមើលបច្ចុប្បន្នភាពរូបភាពរៀងរាល់ម៉ោង ដែលជួយធានាថារាល់ម៉ាស៊ីនមេ Outline មានបច្ចុប្បន្នភាពជានិច្ចដោយមានមុខងារ និងការកែលម្អសុវត្ថិភាពចុងក្រោយបំផុត។
ម៉ាស៊ីនមេលើបណ្ដាញដែលត្រូវបានប្រើដើម្បីចូលប្រើ Management API ត្រូវបានចាប់ផ្តើមលើច្រកចៃដន្យនៅលើផ្លូវសម្ងាត់ និងចៃដន្យ។
វិញ្ញាបនបត្រ SSL ដែលចុះហត្ថលេខាដោយខ្លួនឯងត្រូវបានបង្កើតឡើង ដើម្បីឱ្យអាចអ៊ីនគ្រីបការគ្រប់គ្រងរបស់ម៉ាស៊ីនមេ Outline ដោយប្រើ TLS ទោះបីជាមិនមានឈ្មោះដូមែនក៏ដោយ។ ស្នាមម្រាមដៃខុសប្លែកពីគេនៃវិញ្ញាបនបត្រនេះក៏ត្រូវបានបង្កើត និងរក្សាទុកនៅក្នុងកម្មវិធី Outline Manager ដែលជួយការពារការវាយប្រហាររបស់ MITM ផងដែរ។

ការដំឡើង Outline មិនត្រូវការការកំណត់រចនាសម្ព័ន្ធណាមួយ បន្ទាប់ពីដំឡើងរួចនោះទេ។

សុវត្ថិភាពម៉ាស៊ីនមេ

កម្មវិធី Outline មានកូដចំហ ដែលមានន័យថា នរណាក៏អាចមើលឃើញកូដ និងកែលម្អកូដនោះបានដែរ ប្រសិនបើមានភាពងាយរងគ្រោះទាំងឡាយដែលត្រូវបានរកឃើញ។ កូដរបស់យើងត្រូវបានបង្ហោះនៅលើ GitHub។

លើសពីនេះ ម៉ាស៊ីនមេ Outline ដែលបានដំឡើងទាំងអស់ត្រូវបានដំឡើងកំណែដោយស្វ័យប្រវត្តិ រាល់ពេលកំណែថ្មីត្រូវបានចេញផ្សាយ ដែលធានាថាគ្មានម៉ាស៊ីនមេ Outline ណាត្រូវបានទុកឱ្យដំណើរការកំណែចាស់របស់កម្មវិធីនោះទេ។

ដើម្បីគ្រប់គ្រងលេខកូដចូលប្រើនៅលើម៉ាស៊ីនមេ កម្មវិធី Outline Manager ធ្វើអន្តរកម្មជាមួយសេវាកម្មគ្រប់គ្រងនៅលើម៉ាស៊ីនមេ Outline។ សេវាកម្មគ្រប់គ្រងដំណើរការនៅលើច្រកចៃដន្យ និងនៅលើផ្លូវសម្ងាត់និងខុសប្លែកពីគេ។ សេវាកម្មគ្រប់គ្រងផ្ទាល់មានលក្ខណៈធន់នឹងការស៊ើបអង្កេត ដោយសារតែសេវាកម្មនោះមិនឆ្លើយតបទៅនឹងសំណួរទេ ប្រសិនបើមិនមានការបញ្ជាក់ផ្លូវសម្ងាត់សមស្រប។ ជាចុងក្រោយ រាល់ទំនាក់ទំនងទាំងអស់ទៅកាន់សេវាកម្មគ្រប់គ្រងត្រូវបានអ៊ីនគ្រីបដោយប្រើវិញ្ញាបនបត្រ SSL ដែលចុះហត្ថលេខាដោយខ្លួនឯង។

ទន្ទឹមនឹងនេះ ម៉ាស៊ីនមេ Outline មិនរក្សាទុកកំណត់ហេតុណាមួយឡើយ ដូច្នេះបើទោះបីជាម៉ាស៊ីនមេនោះរងការលុកលុយក៏ដោយ ក៏គ្មានទិន្នន័យអ្នកប្រើប្រាស់ណាត្រូវបានបញ្ចេញដែរ។ ស្វែងយល់បន្ថែមនៅទីនេះ។ Outline ត្រូវបានត្រួតពិនិត្យដោយ Radically Open Security និង Cure53 ក្នុងឆ្នាំ 2018។ មើលរបាយការណ៍នៅទីនេះ។

ការចាត់ចែងចរាចរណ៍ UDP

Outline អាចដំណើរការជា VPN ទូទាំងប្រព័ន្ធ មានន័យថាចរាចរណ៍ UDP ទាំងអស់ត្រូវបានបញ្ជូនឆ្លងបណ្ដាញតាមរយៈម៉ាស៊ីនមេ Outline។

ចរាចរណ៍ DNS

Outline ធ្វើការរកមើល DNS ទាំងអស់តាមរយៈម៉ាស៊ីនមេ Outline ព្រមទាំងការពារការរកមើលទាំងនោះដោយប្រើការអ៊ីនគ្រីបតែមួយដែលត្រូវបានប្រើសម្រាប់សកម្មភាពបណ្តាញទាំងអស់ផ្សេងទៀត។ សំណួរ DNS របស់អ្នកនឹងឆ្លងកាត់ម៉ាស៊ីនមេ Outline ទៅកាន់ Dyn Internet Guide, OpenDNS, Cloudflare DNS ឬ Quad9 DNS។ Outline មិនចុះកំណត់ហេតុការរកមើល DNS របស់អ្នកទេ។