ការរៀបចំ Google Cloud ដោយស្វ័យប្រវត្តិ
ទិដ្ឋភាពរួម
Outline Manager រួមបញ្ចូលមុខងារដែលអាចឱ្យអ្នកកំណត់រចនាសម្ព័ន្ធម៉ាស៊ីនមេ Outline ដោយស្វ័យប្រវត្តិនៅលើម៉ាស៊ីនមេដែលដំណើរការលើ Google Cloud។ ប្រសិនបើអ្នកសម្រេចថាប្រើប្រាស់មុខងារនេះ Outline Manager នឹងស្នើឱ្យអ្នកចូលដោយប្រើគណនី Google របស់អ្នក ដែលនឹងផ្ដល់ការអនុញ្ញាតOAuth ជាក់លាក់ដល់ការដំឡើង Outline Manager លើឧបករណ៍របស់អ្នកសម្រាប់គោលបំណងកំណត់រចនាសម្ព័ន្ធគណនី Google Cloud របស់អ្នក។
ប្រសិនបើអ្នកមិនចង់ផ្ដល់ការអនុញ្ញាតទាំងនេះទេ អ្នកអាចអនុវត្តតាមការណែនាំអំពីការរៀបចំកម្រិតខ្ពស់នៅក្នុង Outline Manager ដើម្បីដំណើរការ Outline លើ Google Cloud Platform។
ការអនុញ្ញាតដែលត្រូវផ្ដល់ឱ្យ
ដើម្បីផ្ដល់ការរៀបចំដោយស្វ័យប្រវត្តិ Outline Manager តម្រូវឱ្យមានការអនុញ្ញាតដូចខាងក្រោមពីគណនី Google របស់អ្នក។
Google Cloud Platform
- មើល និងគ្រប់គ្រងធនធាន Google Compute Engine របស់អ្នក
- មើលទិន្នន័យរបស់អ្នកនៅលើសេវាកម្មនានារបស់ Google Cloud និងមើលអាសយដ្ឋានអ៊ីមែលនៃគណនី Google របស់អ្នក
ព័ត៌មានគណនីមូលដ្ឋាន
- មើលអាសយដ្ឋានអ៊ីមែលចម្បងនៃគណនី Google របស់អ្នក
- ភ្ជាប់អ្នកជាមួយព័ត៌មានផ្ទាល់ខ្លួនរបស់អ្នកនៅលើ Google
សិទ្ធិចូលប្រើបន្ថែម
- គ្រប់គ្រងគម្រោង Cloud Platform របស់អ្នក
- មើល និងគ្រប់គ្រងគណនីទូទាត់វិក្កយបត្រ Google Cloud Platform របស់អ្នក
- គ្រប់គ្រងការកំណត់រចនាសម្ព័ន្ធសេវាកម្ម Google API របស់អ្នក
ការអនុញ្ញាតទាំងនេះអនុញ្ញាតឱ្យយើងដំណើរការមុខងារកម្រិតខ្ពស់សម្រាប់គ្រប់គ្រងម៉ាស៊ីនមេ Outline របស់អ្នក ដែលរួមមាន៖
- ការអនុញ្ញាតឱ្យអ្នកជ្រើសរើសគណនីទូទាត់វិក្កយបត្រត្រឹមត្រូវ
- ការបង្កើតគម្រោងថ្មី ដើម្បីរៀបចំម៉ាស៊ីនមេ Outline របស់អ្នក
- ការផ្ដល់បញ្ជីមជ្ឈមណ្ឌលទិន្នន័យដែលអាចប្រើបាន
- ការបង្កើតម៉ាស៊ីននិម្មិតថ្មីដើម្បីដំណើរការ Outline
- ការកំណត់រចនាសម្ព័ន្ធម៉ាស៊ីននិម្មិតថ្មីដោយប្រើ Outline
ការដកហូតការអនុញ្ញាត
អ្នកអាចដកហូតសិទ្ធិចូលប្រើប្រាស់ Google Cloud Platform សម្រាប់ Outline Manager ដោយចូលទៅកាន់គណនីរបស់ខ្ញុំ។ ប្រសិនបើអ្នកដកហូតសិទ្ធិចូលប្រើប្រាស់ ម៉ាស៊ីនមេទាំងឡាយដែលអ្នកបានបង្កើតដោយប្រើការរៀបចំដោយស្វ័យប្រវត្តិនឹងនៅតែដំណើរការដដែល ប៉ុន្តែនឹងលែងបង្ហាញនៅក្នុង Outline Manager ទៀតហើយ។ ដើម្បីស្ដារសិទ្ធិចូលប្រើប្រាស់វិញ គ្រាន់តែភ្ជាប់ទៅ Google Cloud Platform ឡើងវិញ ដោយចាប់ផ្ដើមលំហូររៀបចំដោយស្វ័យប្រវត្តិ។
ការរៀបចំគម្រោង Outline
ការរៀបចំ Google Cloud ដោយស្វ័យប្រវត្តិប្រើប្រាស់គម្រោង Google Cloud តែមួយ ដើម្បីរៀបចំម៉ាស៊ីនមេ Outline របស់អ្នក។ គម្រោងនេះត្រូវបានបង្កើតក្នុងអំឡុងពេលប្រើប្រាស់ការៀបចំដោយស្វ័យប្រវត្តិលើកដំបូង ដោយមាន ID គម្រោងដែលបានណែនាំ ដែលចាប់ផ្ដើមដោយ “Outline-” បន្ទាប់មកជួរអក្សរដែលរួមមានតួអក្សរចៃដន្យ។ អ្នកអាចជ្រើសរើស ID គម្រោងផ្សេងបាននៅពេលបង្កើត ប្រសិនបើអ្នកចង់។ គម្រោងនេះនឹងត្រូវបានដាក់ឈ្មោះថា “ម៉ាស៊ីនមេ Outline”។
គណនីទូទាត់វិក្កយបត្រ
គម្រោង Google Cloud តម្រូវឱ្យមាន “គណនីទូទាត់វិក្កយបត្រ” ដែលបានភ្ជាប់ ដែលកំណត់ព័ត៌មានអំពីការទូទាត់ប្រាក់។ នៅពេលអ្នកប្រើប្រាស់ការរៀបចំ Google Cloud ដោយស្វ័យប្រវត្តិលើកដំបូង អ្នកនឹងត្រូវបានស្នើឱ្យផ្ដល់គណនីទូទាត់វិក្កយបត្រ ដើម្បីភ្ជាប់ជាមួយម៉ាស៊ីនមេ Outline របស់អ្នក។ ជួនកាល ម៉ាស៊ីនមេនឹងឈប់ដំណើរការ ដោយសារមានបញ្ហាពាក់ព័ន្ធនឹងគណនីទូទាត់វិក្កយបត្រ។ ក្នុងករណីនេះ អ្នកគួរតែចូលGoogle Cloud Console, កំណត់ទីតាំងគម្រោង Google Cloud ដែលបានភ្ជាប់ជាមួយ Outline (ឈ្មោះថា “ម៉ាស៊ីនមេ Outline”) និងធ្វើបច្ចុប្បន្នភាពការកំណត់ការទូទាត់វិក្កយបត្រ។
ការលុបម៉ាស៊ីនមេ
ប្រសិនបើអ្នកចង់លុបម៉ាស៊ីនមេរបស់អ្នកដែលបានបង្កើតឡើងដោយប្រើប្រាស់ការរៀបចំដោយស្វ័យប្រវត្តិ វិធីងាយបំផុតដើម្បីធ្វើដូច្នោះគឺពីក្នុង Outline Manager។ ទោះបីជាយ៉ាងណាក៏ដោយ ប្រសិនបើអ្នកចង់លុបម៉ាស៊ីនមេដោយខ្លួនឯង អ្នកអាចចូលGoogle Cloud Console, ស្វែងរកគម្រោងដែលត្រូវបានបង្កើតក្នុងអំឡុងពេលរៀបចំដំបូង (ឈ្មោះថា “ម៉ាស៊ីនមេ Outline”) រួចលុបធនធាននៅទីនោះ ឬបិទគម្រោងនេះ។